6391《誰家無灶底，那家不煲湯？》

最憎那些殺人兇手，傷天害理，冇陰功，仲要衰冇公德心。
像先前提及的「灶底藏屍案」（3月3日《空間留下的記憶》），發生於1967年9月，左派暴動後不久。
當時的小朋友，出街已經飽受驚嚇：一怕示威暴徒。二怕通街「菠蘿」（《同胞勿近》）。三怕吃催淚彃。
怕怕怕。不料暑假後開學，竟然來多一單「灶底藏屍」，報紙日日大字標題，圖文並茂，真係唔得佢死。
小朋友特別驚。因為案件發生在「厨房」，又在「灶底」，家家戶戶都設有，平時煑飯炒餸的處所。
竟然暗藏碎屍！容乜易跌啲手指腳趾出來加餸，嚇餐飽。成為香港小朋友的「集體童年陰影」。
好不容易，幾十年過去，恐怖記憶冲淡。驚魂甫定，以為新一代小朋友，可以在安定繁榮的環境中長大。
不料忽然爆出單「煲湯」。豈有此理，「青紅蘿蔔湯」同你有仇呀！你屋企以後唔使煲湯嘅。今次搞到大人細路哥都驚，成功製造「跨世代集體恐怖回憶」。
又由於資訊發達，有蔓延全球各地的趨勢，成為另類「恐襲」。聰明朋友為此發噩夢，平時禁止談論，粗暴干預言論自由。
幸好香港人總有辧法適應。驚？除了日前建議，將凶案轉「科技台」/「偵探台」（2月28日《當隣居發生凶殺案》）等。
仲可以轉「粵語片台」（《無頭東宮生太子》1957年）。或「日本動漫台」（《銃夢》1990-95年）。故事都係講一個「死人頭」。
亦可以「低俗化」。當日找回人頭後，行山及水上運動人士，已放下心頭大石。不料在中環某燒臘店午膳，例湯赫然是「青紅蘿蔔」。燒臘師父与女侍應鬥嘴：「攞埋你個頭落去煲湯！」
並加句專業意見：「煲得耐會起膠。」全店上下哈哈哈，喪笑一場過去了，唔驚。😁