短歌行】018《今秋「蟹粉」泛濫成災》

對於飲食，有個致命的弱點：衰「好奇」。
譬如說，有一次在倫敦機場的候機室，看見「B鬼」煮雲吞麵，你會不會試？
聰明朋友与智慧先生，以九秒九速度彈開，斷然拒絕。可憐的我，明知風險甚高，仍是要捧住個碗，衰衰咁埋去試一次……。
結果？不消提。
隔一段時間，故態復萌，今年死於「蟹粉」。公司附近有小上海及馬拉店，两間都賣賣蟹粉小籠包（80元4粒），下午茶餐蟹粉飯，蟹粉麵等，只售40多元。
蟹粉喎，回想起以前在「天香樓」，吃蟹粉麵，蟹粉翅的好日子；仲有跟店夥「小寧波」學拆蟹粉，成為「天香派」弟子的年輕歲月。
現今，点解咁平嘅？又係中「二十元買粒鑽石的騙局」，從容就義，照吃！
食時幾好味，但之後，天旋地轉，只覺調味料有点古怪，不舒服了整個晚上。
翌日早上落街，見貼滿街招海報，又係 sell 「蟹粉」，卻是撈意粉，撈 pizza ，中西合璧，仲出動「紹興花彫酒」！
睇見都暈暈地，難怪中伏。平價蟹粉裏，一定落入不明來歷的香料与黃酒，食後，看各人的體質与運氣。
可能与科技進步有關。近年，「大閘蟹」可以大量繁殖，繼「三文魚」，「黑松露菌」等，成為大衆化食材。多好😊。