6663《寧願「好收尾」，或「好開頭」？》

最近有好消息：朋友家道殷實，人口平安，應該可以過一個「歡喜年」。
誰敢高調招搖？他的心肝仔，仍是卜卜跳：「好彩，這個 2024 新年，算是開得不錯。」
筆者卻要更正：「不，算舊曆，剛踏入歲末十二月，仍屬癸卯兔年。還有一個月才過舊曆年，你是《好收尾》。」
我們中國人，當然沿用中國曆。算命看吉凶禍福，亦以舊曆為基礎。
除非像日本。早在明治維新時，已棄用中國農曆，全盤西化，行使一百幾十年。
所以算新年，日本社會以新曆1月1日為開端。這個 2024，開得非常惡劣，新年一日一災：地震，空難，火災，無差別殺人等，充滿不祥感。
如果我是日本天皇，見勢頭不對，會嗱嗱聲，頒佈國民回復使用中國曆。咁，先前的「一日一災」，統統變成「年尾舊事」。稍後，踏入甲辰龍年，大家忙於送舊迎新，衰嘢一律冇我份。
但當然沒可能。曆法是國家大事，不能「彈弓手」。不論好与壞，我們俱要承受。
咁如果有得揀，你會揀「好開頭」？還是寧願「好收尾」？
當然，最好係「由頭好到尾」。可惜世事無完美，如果「好」到這個地步，其他方面必有破損。
或許年輕時，希望有個「好開頭」：車如流水馬如龍，花月正春風。如張愛玲話齋：「成名要趁早。」受訪/上鏡/拍照都靚啲，留給大家美好印象。
逐漸老去，樣樣變艱難。這時候，更加渴望「好收尾」。因為未試過晚境坎坷，不知道那種無奈与悲涼。
剛巧，最近電影資料館，選映馮寶寶 5 歲時的代表作《雨夜驚魂》（1960年），全場鐵粉熱情支持；两名兒子遠來捧場；人氣鼎盛，光彩到不得止了。
算是「好收尾」，祝大家也是如此，年尾一團和氣。😊